Tinatayang Php238,000 halaga ng shabu ang nasabat sa isang suspek sa isinagawang buy-bust operation ng Alaminos City Police Station at PDEA Regional Office 1 sa Barangay Bued, Alaminos City, Pangasinan nito lamang Marso 20, 2024.
Kinilala ni Police Lieutenant Colonel Bernabe F Ramos, Officer-In-Charge ng Almaminos CPS, ang suspek na si alyas “Julius”, 37 taong gulang, may asawa, walang trabaho at residente ng Barangay Sabangan, Alaminos City, Pangasinan.
Nabili sa suspek ng nagpanggap na poseur buyer ang isang heat-sealed transparent plastic sachet na naglalaman ng hinihinalang shabu na may bigat na humigit kumulang limang (5) gramo at may Standard Drug Price na Php34,000.
Matapos maaresto ang suspek ay nakumpiska naman ng anim na heat-sealed transparent plastic sachet na naglalaman ng hinihinalang shabu na may bigat na humigit kumulang 30 gramo at may Standard Drug Price na Php204,000, kasama ang tatlong genuine Php100 bill, sampung (10) Php1000 at limang (5) Php500 na boodle money.
Kasong paglabag sa Sections 5 at 11 ng Article II ng Republic Act 9165 o Comprehensive Dangerous Drugs Act of 2002 ang kakaharapin ng suspek.
Tinitiyak ng buong hanay ng Alaminos City Police Station ang kanilang walang humpay na pagpapatupad sa kampanya kontra ilegal na droga sa kanilang nasasakupan upang magkaroon payapa at ligtas na komunidad tungo sa Bagong Pilipinas.
Panulat ni Patrolwoman Jenilyn Consul
