Nakumpiska ng mga awtoridad ang mahigit Php23.2 milyong halaga ng marijuana bricks at arestado ang tatlong drug personalities dahil sa paglabag sa Republic Act 9165 o mas kilala bilang “Comprehensive Dangerous Drugs Act of 2002” sa Purok 5, Bulanao, Tabuk, Kalinga noong ika-27 ng Setyembre 2024.
Kinilala ang mga suspek bilang 29 taong gulang, pizza vendor, walang asawa, at residente ng McArthur Village, Longos, Malolos, Bulacan; 21 taong gulang, may asawa, construction worker, katutubo ng Guiguinto, Bulacan at residente ng Buscalan, Tinglayan, Kalinga; at 25 taong gulang, may asawa, magsasaka, katutubo ng Buscalan, Tinglayan, Kalinga at residente ng Loccong, Tinglayan, Kalinga.
Naging matagumpay ang pag-aresto sa pinagsamang operasyon ng mga operatiba sa pangunguna ng Tabuk City Police Station; 1st at 2nd Kalinga PMFC; Provincial Drug Enforcement Unit; Provincial Intelligence Unit; Kalinga Provincial Explosive and Canine Unit; Regional Intelligence Division, PRO-CAR; 1503rd RMFB15; Special Operations Unit-Drug Enforcement Group; PDEA, Kalinga; Provincial Intelligence Team, Kalinga; KPLO, 111 Special Action Company, at 111 Special Action Battalion PNP SAF.
Ang operasyon ay nagresulta sa pagkakakumpiska ng 192 bricks ng tuyong dahon ng marijuana na nakabalot sa transparent na plastik, na may timbang na 192 kilo at may halagang Php23,240,000 Standard Drug Price.
Nakumpiska rin ang isang sky blue HAIMA MPV; temporary driver’s license; photocopy ng OR/CR ng sasakyan; tatlong cellphone, dalawang motorsiklo isang itim na keyless entry key para sa Haima; at dalawang susi ng motorsiklo.
Ang resulta ng operasyon ay nagpamalas ng pagsisikap at dedikasyon ng Kalinga PNP at iba’t ibang ahensya ng pamahalaan sa pagganap ng tungkulin, at sinisiguro na patuloy na paiigtingin ang kampanya laban sa ilegal na droga at iba pang anyo ng kriminalidad upang mapanatiling ligtas ang publiko sa Bagong Pilipinas.
Panulat ni Patrolwoman Melanie Amoyong
