Nasamsam ang tinatayang Php204,000 halaga ng hinihinalang shabu mula sa isang Street Level Individual sa isinagawang buy-bust operation ng Butuan City Police Office-City Drug Enforcement Unit sa Purok 6, Barangay Amparo, Butuan City, Agusan del Norte bandang 1:00 ng madaling araw nito lamang Marso 13, 2025.
Kinilala ni Police Lieutenant Jericson M. Derro, Deputy Chief ng City Drug Enforcement Unit, sa ilalim ng mahigpit na superbisyon ni Police Captain Ramon U. Atenta Jr., Officer-In-Charge ng Butuan City Drug Enforcement Unit, ang suspek na si alyas “Mon Mon,” 26 taong gulang, driver, at residente ng Purok 3, Barangay Los Angeles, Butuan City.
Ayon kay PLt Derro, isang operatiba na nagpanggap bilang poseur-buyer ang bumili ng isang heat-sealed transparent plastic sachet na naglalaman ng hinihinalang shabu mula sa suspek.
Nakumpiska mula sa suspek ang kabuuang 30 gramo ng hinihinalang shabu na may tinatayang Standard Drug Price na Php204,000, dalawang cellphone (isang android at isang keypad phone), marked money na nagkakahalaga ng Php7,000, kabilang ang isang genuine Php1,000 bill at anim na piraso ng counterfeit Php1,000 bills; isang digital weighing scale, iba’t ibang piraso ng cut transparent plastic sachets, isang driver’s license na nakapangalan sa suspek, at isang motorsiklo (Honda XRM 125, plate no. MS82123).
Patuloy ang kampanya ng Butuan City PNP laban sa ilegal na droga upang mapanatili ang kaayusan at kapayapaan sa lungsod, alinsunod sa adbokasiyang “Sa Bagong Pilipinas: Ang gusto ng Pulis, Ligtas Ka!.”
Panulat ni Pat Karen Mallillin
