Quezon City — Tinatayang Php204,000 halaga ng shabu ang nasakote sa apat na drug pusher sa isinagawang buy-bust oepration ng mga tauhan ng Holy Spirit Police Station 14 nito lamang Huwebes, Mayo 12, 2023.
Kinilala ni Police Brigadier General Nicolas Torre lll, District Director ng Quezon City Police District (QCPD), ang mga suspek sa pangalang Marlon, 43; at Aiza, 35, na Top 1 at Top 9 Station Level Drug Personalities ng PS 14, kapwa residente ng Brgy. Pasong Tamo, Quezon City; kasama sina Archie, 33; at George, 43, kapwa residente naman ng Brgy. Tandang Sora, Quezon City.
Ayon kay PBGen Torre lll, nadakip ang mga ito bandang 10:45 ng gabi sa No. 25 Upper Barimbao, Brgy. Pasong Tamo, Quezon City ng mga operatiba ng istasyon.
Nakumpiska sa kanila ang 30 gramo ng shabu na nagkakahalaga ng Php204,000, isang pink perfume pouch, at buy-bust money.
Paglabag sa R.A. 9165 o Comprehensive Dangerous Drugs Act of 2002 ang kahaharapin ng mga suspek.
Pinuri ni PBGen Torre III, ang walang humpay na pagsisikap ng mga operatiba ng PS 14 Station Drug Enforcement Unit (SDEU) sa kanilang walang tigil na kampanya laban sa ilegal na droga, aniya, “Ipagpatuloy lang natin ang masigasig na pagpapatupad ng batas laban sa kriminalidad lalo na ang ilegal na droga upang maprotektahan ang mamamayan dito sa ating Lungsod.”
Source: PIO QCPD
Panulat ni PSSg Remelin M Gargantos
