Tandang Sora, Quezon City — Tinatayang Php204,000 halaga ng shabu ang nasabat sa isang suspek sa buy-bust ng PNP noong Abril 11, 2022.
Kinilala ni District Director Police Brigadier General Remus Medina ng Quezon City Police District ang suspek na si Manuel Maraño y Cleofas, 32, at residente ng Upper Banlat, Brgy. Tandang Sora, Quezon City.
Ayon kay General Medina, nahuli si Maraño bandang alas-2:30 ng hapon sa kanya mismong tirahan ng mga operatiba ng QCPD.
Ayon pa kay General Medina, nakumpiska sa suspek ang 30 gramo ng hinihinalang shabu at may street value na Php204,000, limang gramo ng hinihinalang marijuana, isang cellphone, isang brown wallet, at perang ginamit sa transaksyon.
Nahaharap ang suspek sa kasong paglabag sa RA 9165 o Comprehensive Dangerous Drugs Act of 2002.
“Ang inyong mga lingkod-bayan sa aming himpilan ay hindi kailanman hihinto sa pagsugpo ng droga sa aming nasasakupan at hindi kami matitinag sa anumang panganib na maaaring idulot ng pagkasa ng mga operasyon laban sa mga pinaghihinalang nagtutulak ng droga,” dagdag pa ni PBGen Medina.
Source: QCPD PIO
###
Panulat ni PEMS Ronald Condes
