Nagsagawa ng buy-bust operation ang Station Drug Enforcement Unit ng Taguig City Police Station na nagresulta sa pagkakadakip sa suspek at pagkakarekober ng mahigit sa Php203,000 halaga ng shabu nito lamang Martes, Setyembre 17, 2024.
Kinilala ni Police Brigadier General Leon Victor Z Rosete, District Director ng Southern Police District, ang suspek na si alyas “Kadir”, 50 anyos.
Ayon sa ulat, naganap ang operasyon bandang 5:30 ng hapon malapit sa isang beauty parlor sa kahabaan ng Maharlika Road, Barangay Upper Bicutan, Taguig City na humantong sa pagkakasamsam ng anim na heat-sealed transparent plastic sachets na naglalaman ng hinihinalang shabu, na may bigat na humigit-kumulang 29.9 gramo na may tinatayang halaga na Php203,320, isang Php500 bill at limang Php1,000 bill na pekeng pera na ginamit bilang buy-bust money at isang coin purse.
Reklamo para sa paglabag sa Section 5 at 11 Article II ng Republic Act 9165 o “Comprehensive Dangerous Drugs Act of 2002” ang kakaharapin ng suspek.
Tinitiyak ng SPD na hindi titigil sa pagsasagawa ng kampanya kontra ilegal na droga at anumang uri ng kriminalidad upang mapanatili ang kaayusan at katahimikan ng ating bayan.
Source: SPD PIO
Panulat ni PSSg Remelin M Gargantos
