Talisay City, Cebu – Tinatayang nasa Php20,400,000 halaga ng hinihinalang shabu ang nasabat sa buy-bust operation ng Talisay City PNP nito lamang Sabado, Hunyo 18, 2022.
Kinilala ni Police Lieutenant Colonel Randy Caballes, Chief of Police ng Talisay City Police Station ang suspek na si Lyndon Rongasan alyas “Palta”, 34, residente ng 1265 Paco Street, Brgy. Sta, Ana, Metro Manila at kasalukuyang nakatira sa Saint Jude Street, Brgy. Hipodromo, Cebu City.
Ayon kay PLtCol Caballes, naaresto ang suspek bandang 10:16 ng gabi sa Sombria Road, Brgy. Lawaan 1, Talisay City, Cebu ng mga operatiba ng Station-Drug Enforcement Unit Team sa pangunguna ni Police Lieutenant Elwood Ebona katuwang ang Police Drug Enforcement Unit sa pangunguna ni Police Lieutenant Colonel Mark Gifter Sucalit.
Ayon pa kay PLtCol Caballes, nakuha mula sa suspek ang 8 pirasong transparent plastic pack na tumitimbang nang hindi bababa sa 3 kilos ng hinihinalang shabu na may tinatayang halaga na Php20,400,000; isang pirasong black back pack; isang eco bag; isang brown paper bag na ginamit bilang lalagyan ng ilegal na droga; isang Huawei cellphone at buy-bust money.
Mahaharap sa kasong paglabag sa Section 5 at 11 ng RA 9165 o ang Comprehensive Dangerous Drugs Act of 2002 ang suspek.
Ang matagumpay na operasyon kontra ilegal na droga ng Talisay City PNP ay isang patunay na ang Pambansang Pulisya ay seryoso upang lutasin ang problema sa ilegal na droga sa ating bansa.
###
