Tinatayang Php2,900,000 halaga ng marijuana ang nadiskubre ng Kibungan PNP sa isinagawang marijuana eradication sa Sitio Camayan, Tacadang, Kibungan, Benguet nito lamang ika-7 ng Abril 2024.
Ayon kay Police Colonel Joseph P Bayongasan, Provincial Director ng Benguet Police Provincial Office, naging matagumpay ang operasyon sa pagsisikap ng mga operatiba sa pangunguna ng Kibungan Municipal Police Station kasama ang PIU/PDEU Benguet PO, RID PRO Cordillera, at PDEA-CAR.
Ang operasyon ay nagresulta sa pagkakadiskubre ng dalawang plantasyon kung saan ang unang site ay may kabuuang sukat na 500 square meters at may tanim na humigit kumulang 2,500 fully grown marijuana plants na may Php500,000 Standard Drug Price, habang sa pangalawang site naman ay may natuklasang 20 kilograms ng dried marijuana stalks na may Php2,400,000 Standard Drug Price.
Bagamat walang nahuling cultivator, lahat ng nadiskubreng halaman ng marijuana at dried marijuana stalks ay binunot at sinunog sa lugar habang nagdala sila ng sample upang isumite sa RFU-Cordillera para sa qualitative test.
Pinuri naman ni PCol Bayongasan ang mga operatiba sa kanilang matagumpay na operasyon at siniguro naman na lalo pa nilang paiigtingin ang kanilang kampanya kontra sa ilegal na droga upang matuldukan ang paglaganap ng pinagbabawal na gamot sa kanilang nasasakupan.
Panulat ni Patrolwoman Liezle Digman
