Lapu-Lapu City – Tinatayang Php2,856,000 halaga ng shabu sa halos kalahating kilo ng ilegal na droga ang nasamsam ng kapulisan ng Lapu-Lapu City Police Office sa suspek na nadakip sa buy-bust operation sa New Terminal, Brgy. Pajo, Lapu-Lapu City, noong Sabado, Oktubre 28, 2023.
Kinilala ni Police Colonel Elmer Lim, City Director ng Lapu-Lapu City Police Office, ang suspek si “Jordan”, 36, construction worker, residente ng San Roque, Brgy. Lorega, Cebu City.
Ayon kay PCol Lim, naaresto ang suspek bandang alas-7:50 ng gabi ng mga operatiba ng City Intelligence Unit at City Drug Enforcement Unit.
Maliban sa mga droga, nasamsam pa mula sa suspek ang sling bag na ginamit bilang lagayan at ang buy-bust money.
Nahaharap ang suspek sa mga reklamong paglabag sa RA 9165 o Comprehensive Dangerous Drugs Act of 2002.
Bahagi ang matagumpay na operasyon sa mahusay at maayos na pagsasakatuparan ng plano at serbisyo ng kapulisan sa kabila ng paghahanda para sa Barangay at Sangguniang Kabataan Eleksyon.
