Cebu City, Philippines – Tinatayang Php2,862,800 halaga ng hinihinalang shabu ang nakumpiska sa isang lalaking High Value Individual (Regional Level) ikinasang buy-bust operation ng mga tauhan ng Cebu City PNP at PDEA sa Ma. Gochan St., Brgy. Mambaling, Cebu City nito lamang ika-28 ng Hulyo 2022.
Kinilala ng Police Colonel Ernesto Salvaldor T Tagle, City Director ng CCPO, ang suspek na si Jesus Hermosora Belamia, alyas ” Nano”, 47, residente ng Lawis Brgy. Pasil, Cebu City at kabilang sa High Value Individual (Regional Level).
Ayon kay PCol Tagle, nasakote ang suspek bandang 10:30 ng gabi ng mga operatiba ng SDEU, Station 11 sa pamumuno ni Police Major Jonathan Bethoovan Taneo, Chief of Police ng Cebu City Police Office katuwang ang PDEA.
Nakuha mula kay alyas ” Nano” ang humigit kumulang 421 gramo ng hinihinalang shabu na tinatayang may DDB value na Php2,862,800; 21 piraso ng iba’t ibang plastic transparent sachet; sling bag at buy-bust money.
Ang mga nakumpiskang ebidensya ay nasa kustodiya ng Cebu City Forensic Unit 7 para sa tamang pagsusuri, samantala ang suspek naman ay nasa pangangalaga na ng mga awtoridad para sa tamang proseso at disposisyon.
Ang pagkakadakip sa naturang suspek ay isa lamang sa napakaraming aksyong isinasagawa ng Cebu City Police Office sa pangunguna ni Police Colonel Ernesto Salvador T Tagle upang tuluyang maparalisa ang paglaganap ng ilegal na droga at gawain sa lungsod.
Ang Central Visayas PNP katuwang ang buong hanay ng Philippine National Police ay patuloy na paiigtingin ang kanilang laban patungkol sa ilegal na droga na nagdudulot ng samu’t saring masamang epekto sa ating mga kababayan at sa komunidad.
Panulat ni Patrolwoman Kyla Hannah R Evangelista
