Nasabat ang tinatayang Php2,700,000 halaga ng hinihinalang shabu sa ikinasang buy-bust operation ng Butuan City Police Office City Drug Enforcement Unit mula sa tatlong indibidwal na itinuturing na High Value Target (HVT) sa Purok-4 Barangay Holy Redeemer, Butuan City, Agusan del Norte bandang 12:30 ng tanghali nito lamang Marso 8, 2025.
Kinilala ni Police Colonel Rommel D Villamor, Hepe ng Butuan City Police Station, ang mga suspek na sina alyas “Yral/Lary”, 31-anyos residente ng Sarimanok Marawi City ngunit kasalukuyang naninirahan sa Barangay Holy Redeemer, Butuan City na dati nang naaresto dahil sa paglabag sa Republic Act 9165 noong 2016; alyas “Ram”, 41-anyos security guard at residente ng Barangay Bilay, Butuan City; at si alyas “Letty”, 40-anyos, at residente ng Purok-4 Barangay Magsikap Rizal, Occidental Mindoro.
Sa operasyon ay nasamsam mula sa mga suspek ang dalawang knot-tied transparent plastic sachets na naglalaman ng hinihinalang shabu; dalawang medium-sized heat-sealed plastic sachets na may lamang hinihinalang shabu; 22 small heat-sealed plastic sachets ng hinihinalang shabu na may kabuuang halaga na aabot sa Php2,700,000; at iba’t ibang drug paraphernalia.
“Ang tagumpay ng operasyong ito ay patunay sa matatag na pangako ng Butuan City Police Office na sugpuin ang iligal na droga sa ating lungsod. Malaking dagok ito sa mga sindikato ng droga sa lugar at magsilbing babala sa iba pang sangkot sa ganitong ilegal na gawain. We encourage the public to continue cooperating with authorities by providing information about illegal drug activities in their communities. Together let us ensure that Butuan City remains safe and peaceful,” dagdag pa ni PCol Villamor.
