Nasabat ng mga awtoridad ang nasa mahigit Php2,720,000 halaga ng shabu sa Barangay San Isidro, Angono, Rizal nito lamang Enero 19, 2025.
Kinilala ang mga naarestong suspek na sina alyas “Rodney,” 27; alyas “Melquiadez,” 73; at alyas “Gladdys,” 45 na pawang mga residente ng Barangay San Isidro, Angono, Rizal, at nakalista bilang High Value Individuals (HVI).
Arestado rin sina alyas “Jose,” 32, residente ng Barangay Muzon, Taytay, Rizal, at alyas “Samuel,” 48, residente ng Barangay San Isidro, Angono, Rizal, parehong nakategorya bilang Street Level Individuals (SLI). Lahat ng mga suspek ay nasa ilalim ng Angono MPS Drug Watchlist.
Nakumpiska ng mga awtoridad sa naturang operasyon ang 11 heat-sealed transparent plastic sachet at dalawang (2) knot-tied transparent plastic sachet ng hinihinalang shabu, na tumitimbang ng humigit kumulang 400 gramo na nagkakalahaga ng Php2,720,000. Nasamsam din ang dalawang Android phone, isang digital weighing scale, isang brown na handbag, at buy-bust money.
Nahaharap ang mga suspek sa kasong paglabag sa Reppublic Act 9165, na kilala rin sa tawag na “Comprehensive Dangerous Drugs Act of 2002”.
Pinaalalahanan naman ni PBGen Paul Kenneth T Lucas, Regional Director ng PRO CALABARZON na hindi tumitigil ang kapulisan upang labanan ang paglaganap ng iligal na droga sa lalawigan. Patuloy din na paiigtingin ang operasyon upang maprotektahan ang publiko at itaguyod ang panuntunan ng batas.
Source: RPIO-4A
Panulat ni Pat Maria Sarah P Bernales
