Laguna – Tinatayang Php2,380,000 na halaga ng shabu ang nasabat sa dalawang High Value Individual sa ikinasang buy-bust operation sa Brgy. San Cristobal, San Pablo City, Laguna nito lamang Miyerkules, Pebrero 15, 2023.
Kinilala ni Police Colonel Randy Glenn Silvio, Acting Provincial Director ng Laguna Police Provincial Office, ang dalawang suspek na sina alyas “Chelle” at “Ryan”, pawang mga residente ng Paranaque City.
Ayon kay PCol Silvio, bandang 8:15 ng gabi naaresto ang dalawang suspek sa naturang barangay ng pinagsanib na puwersa ng San Pablo City Police Station at Provincial Drug Enforcement Unit.
Narekober sa dalawang suspek ang tatlong piraso ng transparent plastic bag, isang pirasong plastic sachet na naglalaman ng hinihinalang shabu na tumitimbang ng 350 gramo na may tinatayang halaga na Php2,380,000, isang pouch, isang cellphone, 29 pirasong Php1,000 bill bilang boodle money at apat na pirasong Php500 bill na ginamit bilang buy-bust money.
Ang dalawang suspek ay nahaharap sa kasong paglabag sa RA 9165 o Comprehensive Dangerous Drugs Act of 2002.
“Sa pagkaaresto ng mga drug personalities na ito ay binibigyang parangal ko ang mga kapulisan ng Laguna sa sipag at dedikasyon para magampanan ang kanilang sinumpaang tungkulin”, ani PCol Silvio.
Panulat ni PEMS Joe Peter Cabugon/RPCADU4A
