Cebu City – Nakumpiska ang nasa Php2.1 milyong halaga ng shabu sa dalawang High Value Individual sa isinagawang buy-bust operation ng Cebu City Police Office sa Escario Street, Brgy. Kamputhaw, Cebu City, nito lamang Biyernes, Setyembre 29, 2023.
Kinilala ni Police Colonel Ireneo Dalogdog, City Director ng Cebu City Police Office, ang mga nadakip na sina alyas “Tata”, 31, ng Brgy. Calamba at alyas “Luis”, 39, ng Brgy. Sawang Calero, Cebu City.
Dakong 10:30 ng umaga ng maaresto ng pinagsanib na puwersa ng City Intelligence Unit at City Drug Enforcement Unit ang mga suspek at nakumpiska ang tinatayang 310 gramo ng shabu na nagkakahalaga ng Php2,108,000, buy-bust money, at isang handbag na ginamit bilang lagayan ng ilegal na droga.
Nahaharap ang mga suspek sa mga kaukulang kaso ng paglabag sa RA 9165 o Comprehensive Dangerous Drugs Act of 2002.
Pinuri naman ni PBGen Anthony Aberin, Regional Director ng PRO7, ang pagsisikap ng hanay ng kapulisan sa rehiyon sa pagtataguyod ng pinakamataas na pamantayan ng propesyonalismo at serbisyo publiko sa pagsusulong ng agresibo at tapat na mga operasyon.
“This notable achievement illustrates our commitment to maintaining peace and order while delivering the best service to the Cebuano community ensuring their safety, and security 24/7,” dagdag ni PBGen Aberin.
