Nasabat ang Php2.1 milyong halaga ng hinihinalang marijuana sa buy-bust operation ng mga tauhan ng Cavite PNP sa Barangay Victoria Reyes, Lungsod ng Dasmariñas, Cavite, nito lamang Hulyo 19, 2024.
Ayon kay PLtCol Julius B. Balano, Hepe ng Dasmariñas Component City Police Station, ang suspek ay kinilalang si alyas “Bob”, 35 taong gulang.
Sa masusing pag-iimbestiga ng mga operatiba ng City Drug Enforcement Unit ng Dasmariñas CCPS, PDEU Cavite PPO, PNPDEG-4A SOU Cavite, at RIU4A-PIT Cavite ay napasakamay nila ang suspek.
Narekober sa suspek ang ilegal na droga o pinatuyong dahon ng marijuana na tumitimbang ng humigit-kumulang 6,020 gramo na may Standard Drug Price na Php2,100,000.
Ang naarestong suspek ay nahaharap sa mga kasong paglabag sa Republic Act 9165 habang ang mga nakumpiskang ilegal na droga ay dinala sa Cavite Provincial Forensic Unit, Lungsod ng Imus para sa chemistry examination.
Sa mensahe ni PCol Eleuterio Ricardo Jr., Provincial Director ng Cavite PPO, “Tuloy-tuloy ang operation ng kapulisan ng Cavite laban sa ilegal na droga, upang sa ganun ay mapanatili ang maayos, ligtas at tahimik na lalawigan, dahil sa Bagong Pilipinas, Ang Gusto ng Pulis, Ligtas Ka.”
Ang mas pinaigting na kampanya ng ating kapulisan laban kriminalidad ay tanda lamang ng pagbabago at ang hangarin ng mas maayos, matiwasay at mas maunlad na Bagong Pilipinas.
Source: Cavite PNP
Panulat ni Pat Maria Sarah P Bernales
