Nasabat sa intelligence-driven operation ng mga tauhan ng Northern Police District (NPD) District Drug Enforcement Unit (DDEU) na nagresulta sa pagkakaaresto sa isang lalaking suspek at pagkakasabat ng mahigit Php1 milyong halaga ng shabu nito lamang Linggo, Disyembre 22, 2024.
Kinilala ni Police Colonel Josefino D Ligan, Officer-In-Charge ng NPD, ang suspek na si alyas “Kuya,” isang 47 anyos na mula sa Sta. Monica, Hagonoy, Bulacan.
Ayon kay PCol Ligan, naganap dakong 3:18 ng madaling araw ang operasyon na humantong sa pagkakarekober ng isang medium at isang knot-tied transparent plastic na naglalaman ng hinihinalang shabu na tinatayang may bigat na 150 gramo at nagkakahalaga ng Php1,020,000, isang genuine Php1,000 bill na ginamit bilang buy-bust money, 35 piraso ng Php1,000 bill bilang boodle money, itim na sling bag, isang itim na Samsung keypad na cellphone, isang itim na Yamaha Aerox na motorsiklo, at driver’s license card.
Sasampahan ng kasong paglabag sa Section 5 (Sale of Dangerous Drugs) at Section 1 (Possession of Dangerous Drugs) sa ilalim ng Republic Act 9165 o “Comprehensive Dangerous Drugs Act of 2002” ang nahuling suspek.
Ang operasyong ito ay isang patunay sa hindi natitinag na pangako ng NPD sa pagpuksa sa ilegal na droga at paglikha ng mas ligtas na kapaligiran para sa mga residente ng Northern Metro Manila. Hinihikayat namin ang publiko na patuloy na suportahan ang aming mga pagsisikap sa pamamagitan ng pag-uulat ng anumang aktibidad ng ilegal na droga sa mga awtoridad. Sama-sama, magagawa nating mas ligtas ang ating mga komunidad,” ani PCol Ligan.
Source: NPD PIO
Panulat ni PSSg Remelin M Gargantos
