Arestado ng mga tauhan ng Southern Police District (SPD) ang isang High Value Individual (HVI) at nakumpiska ang hinihinalang shabu na may tinatayang Standard Drug Price na Php1,020,000 sa isinagawang buy-bust operation sa kahabaan ng Roxas Boulevard, Barangay 76, Pasay City nito lamang Miyerkules, Mayo 7, 2025.
Kinilala ni Police Brigadier General Joseph R. Arguelles, Acting District Director ng Southern Police District, ang suspek na si alyas “Jo”, 29 taong gulang, residente ng Baclaran, Parañaque City.
Nahuli sa aktong nagbebenta ang suspek ng humigit-kumulang 150 gramo ng hinihinalang shabu sa isang poseur buyer.
Narekober sa operasyon ang isang cellphone at marked buy-bust money at nahaharap sa kasong paglabag sa Republic Act 9165 o ang “Comprehensive Dangerous Drugs Act of 2002”.
“Ang pagkakaarestong ito ay babala sa lahat—mabilis kaming kikilos, mariin kaming tatama, at hindi kami magdadalawang-isip. Ang mga nagpapalaganap ng lason sa ating mga komunidad ay wala nang mapagtataguan. Hindi titigil ang SPD hangga’t hindi napapapanagot ang lahat ng sangkot sa kalakalan ng droga,” ani PBGen Arguelles.
Source: SPD PIO
Panulat ni PMSg Remelin Gargantos
