Nadiskubre ng mga kapulisan ang tinatayang Php1,020,000 halaga ng fully grown marijuana plants sa isinagawang marijuana eradication sa Sitio Aninito, Tacadang, Kibungan, Benguet noong ika-27 ng Oktubre 2024.
Ayon kay Police Colonel Joseph P Bayongasan, Provincial Director ng Benguet Police Provincial Office, naging matagumpay ang operasyon dahil sa pinagsanib na pwersa ng mga operatiba na pinangunahan ng Kibungan Municipal Police Station.
Katuwang ng nasabing lokal na kapulisan sa nasabing operasyon ay ang Provincial Intelligence Unit, Provincial Drug Enforcement Unit, Benguet Police Provincial Office, Regional Intelligence Unit 14, at Philippine Drug Enforcement Agency Cordillera- Land Transportation Interdiction Unit.
Ang operasyon ay nagresulta sa pagkadiskubre ng dalawang plantasyon ng marijuana na may lawak na humigit kumulang na 1,020 metro kwadrado na may nakatanim na mahigit kumulang 5,100 na piraso ng fully grown marijuana plants na nagkakahalaga ng Php1,020,000 standard drug price.
Bagamat walang nahuling cultivator, lahat na binunot na fully grown marijuana plants ay naidokumento at sinunog sa mismong lugar.
Pinuri naman ni PCol Bayongasan ang mga operatiba sa kanilang matagumpay na operasyon at sinisiguro na lalo pang paiigtingin ang kampanya kontra sa ilegal na droga.
Ang matagumpay na operasyon ng Benguet PNP ay patunay na kaisa ang Pambansang Pulisya sa pagpapaigting ng kampanya kontra ilegal na droga bilang pagsuporta sa adhikain ng administrasyon para sa isang mas mapayapang Bagong Pilipinas.
Panulat ni Patrolwoman Charlyn Rose B Gumangan
