Davao City – Tinatayang aabot sa Php196,320 halaga ng hinihinalang shabu ang nasabat sa isinagawang buy-bust operation ng PNP sa Purok 7, Brgy. 76-A, Nograles Ave, Davao City, noong Disyembre 11, 2022.
Kinilala ni Police Major Marvin Hugos, Station Commander ng San Pedro Police Station, ang mga suspek na si alyas “Dondon”, 35, at isang menor de edad na si alyas “Pogi” na pawang mga residente ng nasabing lugar.
Ayon kay PMaj Hugos, naaresto ang mga suspek sa isinagawang buy-bust operation ng tauhan ng San Pedro PS kasama ang PDEA XI.
Dagdag pa ni PMaj Hugos, nakuha mula sa suspek ang ilang pakete ng hinihinalang shabu na may bigat na humigit kumulang 12.27 gramo na may street market value na Php196,320 at marked money na ginamit sa operasyon.
Ang suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Samantala, hindi naman titigil ang Police Regional Office 11 sa kanilang mga operasyon upang makamit ang kaayusan at kapayapaan tungo sa kaunlaran ng bansa.
Panulat ni Patrolman Alfred Vergara
