Nasabat mula sa Top 5 City Level Individual at isa pang drug personality ang tinatayang Php195,200 halaga ng shabu sa Holy Trinity Street, Barangay Cabantian, Davao City nito lamang ika-10 ng Hunyo 2024.
Kinilala ni Police Major Antonio Y Luy, Station Commander ng Buhangin Police Station, ang dalawang suspek na sina alyas “Jr”, 36 anyos, mekaniko at alyas “Mastul”, 25 anyos, isang construction worker, pawang mga residente ng Davao City.
Ang dalawang suspek ay naaresto sa isinagawang buy-bust operation ng Station Drug Enforcement Team ng Buhangin Police Station na nagresulta sa pagkasabat ng 12.2 gramo ng shabu na nagkakahalaga ng Php195,200.
Mahaharap ang mga suspek sa kasong paglabag sa Republic Act 9165 o Comprehensive Dangerous Drugs Act of 2002.
Samantala, ang laban kontra kriminalidad ay patuloy na pinapaigting ng Police Regional Office 11 sa pamumuno ni Regional Director Police Brigadier General Aligre L Martinez alinsunod sa kampanya ng Bagong Pilipinas na panatilihin ang kapayapaan at kaayusan tungo sa pagsulong ng bansa.
