Tiklo ang isang lalaki sa kasong paglabag sa Republic Act 10643 o The Graphic Health Warnings Law at nasabat ang tinatayang Php180,000 imported cigarettes sa isinagawang Anti-Illegal Smuggling Operation ng mga awtoridad sa Bangkerohan, Mother Barangay Poblacion, Lungsod ng Cotabato nito lamang ika-13 ng Hunyo 2024.
Kinilala ni Police Major Amil Andungan Jr, Station Commander ng Cotabato City Police Station 1, ang suspek na si alyas “Mon”, 19 anyos at residente ng Lower Capiton, Datu Odin Sinsuat, Maguindanao Del Norte.
Ayon kay PMaj Andungan, matagumpay na naaresto ang suspek ng mga tauhan ng Cotabato City Police Station1 katuwang ang RID, City Tracker team Unit-RIAT, 1401st, 1404th Regional Mobile Force Battalion-A, City Investigation Unit-CCPO at NBI BARMM matapos maaktuhan ang suspek na gumagawa ng ilegal na aktibidad tungkol sa mga hindi dokumentadong highly visible graphic warning components ng mga imported na sigarilyo sa nabanggit na lugar.
Nakumpiska mula sa suspek ang 14 na kahon ng imported cigarettes na may 600 reams ng iba’t ibang klase ng sigarilyo at tinatayang nagkakahalaga ng Php180,000.
Sa pagkamit ng Bagong Pilipinas ng kasalukuyang administrasyon ay may mithiing panatilihin ang payapa at ligtas na bansa katuwang ang hanay ng pulisya na hindi mapapagod sa pagsasagawa ng operasyon upang mapanagot ang mga lumalabag sa batas.
Panulat ni Patrolwoman Veronica Laggui
