Timbog ang isang lalaki matapos mahulihan ng tinatayang Php170,000 halaga ng shabu sa ikinasang buy-bust operation ng mga tauhan ng Caloocan City Police Station nito lamang Sabado, Enero 13, 2024.
Pinangalanan ni PBGen Rizalito Gapas, District Director ng Northern Police District, ang naarestong suspek na si alyas “Bong”, 48, may Live-in partner, at residente ng Phase 4C Excess Lot Barangay 176, Caloocan City.
Ayon sa ulat, naganap ang operasyon bandang 12:38 ng madaling araw sa kahabaan ng Robes 1 Street Barangay 175, Caloocan City matapos magpanggap na isang poseur buyer ang isang pulis sa pangunguna ng Station Drug Enforcement Unit ng Caloocan CPS na naging dahilan ng pagkakadakip kay alyas Bong.
Nakumpiska mula sa suspek ang isang (1) piraso ng medium heat-sealed transparent plastic sachet na naglalaman ng pinaniniwalaang shabu na may kabuuang timbang na 25 gramo na may Standard Drug Price na Php170,000 kasama ang isang (1) pirasong tunay na Php1,000 na ginamit bilang buy-bust money.
Reklamong paglabag sa Seksyon 5 ng Artikulo II ng R.A. 9165 o Comprehensive Dangerous Drugs Act of 2002 ang kahaharapin ng suspek.
Ang matagumpay na operasyon ng pulisya ay dahil sa walang patid na suporta ng komunidad at dedikasyon ng mga tagapagpatupad ng batas na tuluyan ng puksain ang mapaminsalang ilegal na droga.
Source: NPD PIO
Panulat ni PSSg Remelin M Gargantos
