Davao del Norte – Tinatayang Php170,952 halaga ng hinihinalang shabu ang nasabat sa isinagawang buy-bust operation ng mga PNP, noong Martes, Mayo 31, 2022.
Kinilala ni PLtCol Ronnie Fabia, Chief, Regional Police Drug Enforment Unit 11, ang suspek na si alyas “Jan-Jan”, 38, residente ng Purok 1, Barangay Salvacion, Mawab, Davao de Oro na tinaguriang Top 4 High Value Target ng Regional Level.
Ayon kay PLtCol Fabia, naaresto ang suspek sa Purok Malinawon 1, Barangay Magugpo East, Davao del Norte ng pinagsamang pwersa ng Tagum CPS at RPDEU11 sa pamumuno ni PLt Louie Balmori.
Dagdag pa ni PLtCol Fabia, nakuha sa suspek ang mga pakete ng hinihinalang shabu na may bigat na humigit kumulang 25.14 gramo na may street market value na Php170,952 at marked money na ginamit sa operasyon.
Ang suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Samantala, lalo pang paiigtingin ng Police Regional Office 11 ang kampanya laban sa ilegal na droga sa lungsod upang maging payapa at makapagbigay ng magandang serbisyo publiko sa pamumuno ni PBGen Benjamin Silo Jr., PRO11 Regional Director.
###
Panulat ni Patrolman Alfred Vergara
