Caloocan City — Timbog ang isang babae matapos makumpiskahan ng tinatayang Php170,000 halaga ng shabu sa isinagawang buy-bust operation ng Caloocan City Police Station nito lamang Miyerkules, Nobyembre 23, 2022.
Kinilala ni Police Colonel Ponce Rogelio Peñones Jr., Acting District Director ng Northern Police District (NPD), ang suspek na si alyas “Vangie”, 30, residente ng Barangay 120, Caloocan City.
Ayon kay PCol Peñones Jr, bandang 6:00 ng umaga ay naaresto si alyas “Vangie” sa kahabaan ng Julian Felipe Street, Barangay 8, Caloocan City ng mga operatiba ng OCOP-DEU, CCPS kasama ang mga elemento ng 3rd MFC RMFB-NCRPO.
Narekober sa suspek ang limang heat-sealed transparent plastic sachet na naglalaman ng hinihinalang shabu na may timbang na 25 gramo at may Standard Drug Price na Php170,000; isang tunay na Php500, sampung Php1,000 na boodle money na ginamit bilang buy-bust money; at isang kulay itim na coin purse.
Mahaharap ang suspek sa kasong paglabag sa R.A. 9165 o Comprehensive Dangerous Drugs Act of 2002.
Tiniyak ni PCol Peñones Jr, na mas lalo pang paiigtingin ang kampanya kontra ilegal na droga at anumang uri ng kriminalidad sa lugar upang mapanatili ang tahimik at ligtas na pamayanan.
Source: NPD PIO
Panulat ni PSSg Remelin M Gargantos
