Malaking halaga ng ilegal na droga ang nasakote ng Nueva Ecija PNP at arestado ang isang suspek sa isinagawang buy-bust operation sa Barangay San Juan Accfa, Cabanatuan City, Nueva Ecija nito lamang Miyerkules, ika-27 ng Nobyembre 2024.
Kinilala ni Police Colonel Ferdinand D Germino, Provincial Director ng Nueva Ecija Police Provincial Office, ang naarestong suspek na si alyas “Owen”, 46 anyos na lalaki.
Ang naturang operasyon ay isinagawa sa pinagsanib na pwersa ng mga tauhan ng Cabanatuan City Police Station at Provincial Police Drug Enforcement Unit (PPDEU) ng Nueva Ecija Police Provincial Office.
Ayon kay Police Colonel Germino, nahuli ang suspek at nasamsam ang 25 gramo ng hinihinalang shabu na nagkakahalaga ng Php170,000 base sa Dangerous Drugs Board (DDB) value.
Nahaharap ang suspek sa kasong paglabag sa Republic Act 9165 o ang “Comprehensive Dangerous Drugs Act of 2002”.
Patuloy ang Nueva Ecija PNP ng pinaiigting ang kampanya kontra kriminalidad upang masiguro ang kaligtasan ng mamamayan, at nananawagan sa publiko na makipagtulungan sa mga awtoridad sa pamamagitan ng pagbibigay ng impormasyon upang labanan ang paglaganap ng ilegal na droga sa kanilang nasasakupan.
Panulat ni Pat Lixen Reyz A Saweran
