Nadiskubre ng mga otoridad ang tinatayang Php17,200,000 halaga ng Fully Grown Marijuana Plants sa isinagawang marijuana eradication sa Barangay Loccong, Tinglayan, Kalinga nito lamang ika-24 hanggang 26 ng Hunyo 2024.
Ayon kay Police Colonel Gilbert A Fati-ig, Provincial Director ng Kalinga Police Provincial Office, ang matagumpay na operasyon ay ikinasa ng pinagsanib na pwersa ng Kalinga Provincial Drug Enforcement Unit, 1st at 2nd Kalinga Provincial Mobile Force Company, Tinglayan Municipal Police Station, Lubuagan MPS, Pinukpuk MPS, Regional Intelligence Division, Police Regional Office CAR, 111 Special Action Company, 11 Special Action Battalion, PNP Special Action Force, at Philippine Drug Enforcement Agency Kalinga Provincial Office.
Ang operasyon ay nagresulta sa pagkadiskubre ng anim na plantasyon ng marijuana sa isang communal forest na may kabuuang lawak na 5,800 square meters na may humigit kumulang 86,000 na piraso ng Fully Grown Marijuana Plants na nagkakahalaga ng Php17,200,000.
Bagamat walang nahuling cultivator, lahat ng nadiskubreng Fully Grown Marijuana Plants ay binunot at sinunog.
Pinuri naman ni PCol Fati-ig ang mga operatiba sa kanilang matagumpay na operasyon at sinisiguro naman na lalo pa nilang paiigtingin ang kanilang kampanya kontra sa ilegal na droga, gayundin upang matuldukan ang paglaganap ng pinagbabawal na gamot sa kanilang nasasakupan kaugnay sa isinusulong ng Pangulong Ferdinand R Marcos Jr., na Whole-of-Nation Approach na kinakailangan para masugpo ang paglaganap ng ilegal na droga at maging drug-free ang bansa.
Panulat ni Patrolwoman Liezle B Digman
