Tinatayang nasa Php15,172,000 halaga ng shabu ang nakumpiska sa dalawang High Value Individual (HVI) sa inilunsad na buy-bust operation ng PNP Bikol sa Purol 1, Barangay Sto. Domingo, Vinzons, Camarines Norte nito lamang Pebrero 9, 2024.
Kinilala ni Police Colonel Joselito E Villarosa, Provincial Director ng Camarines Norte Police Provincial Office, ang mga suspek na si alyas “Lon”, 38, residente ng Barangay Talobatib, Labo, Camarines Norte at alyas “Ian”, 39, residente ng Barangay San Cirilo, Pasacao, Camarines Sur.
Ayon kay PCol Villarosa, bandang 11:20 ng gabi ng isinagawa ang operasyon ng pinagsanib na mga operatiba ng Vinzons Municipal Police Station-Camarines Norte PPO at Regional Police Drug Enforcement Unit 5 (RPDEU 5) sa pakikipag-ugnayan sa Philippine Drug Enforcement Agency- Camarines Norte.
Nakumpiska mula sa mga suspek ang 2.2 kilo ng hinihinalang shabu na may tinatayang halaga na Php14,960,000 at 40 gramo ng hinihinalang cocaine na may tinatayang halaga na Php212,000. Sa kabuuan ay nasa Php15,172,000 halaga ng ilegal na droga ang narekober.
Mahaharap ang mga suspek sa kasong paglabag sa Republic Act 9165 o ang Comprehensive Dangerous Drugs Act of 2002.
Isinusulong ng PNP Bikol ang pinaigting na kampanya laban sa ilegal na droga tungo sa inaasam na isang maunlad at ligtas na Bagong Pilipinas.
Source: Camarines Norte Police Provincial Office
