Cebu City – Kumpiskado ang tinatayang nasa mahigit Php14 milyong halaga ng shabu mula sa dalawang drug suspek na naaresto sa ikinasa na buy-bust operation ng mga operatiba ng Regional Police Drug Enforcement Unit (RPDEU) at Philippine Drug Enforcement Agency 7 sa South Hills, Brgy. Tisa, Cebu City noong Sabado, Marso 11, 2023.
Ayon kay Police Major Joseph Aquino, Officer-In-Charge ng RPDEU 7, dakong alas-4:30 ng hapon ng ikasa ang operasyon na humantong sa pagkakaaresto ng kanilang subject na kinilalang si “Aljan”, 20, residente ng Aranas St., Brgy. San Nicolas, Cebu City at ang kasamahan nito na si “Hardy”, 41, residente ng All Season, Cogon Pardo, Cebu City.
Nakumpiska sa mga suspek ang nasa 2,175 gramo ng hinihinalang shabu na may halaga na Php14,790,000, isang unit ng iphone 6+ Cellphone, isang Red backpack na ginamit bilang lagayan ng mga droga, at ang apat na piraso na Php500 bill na ginamit bilang buy-bust money.
Ang mga nakalap na ebidensya ay dinala sa PDEA Regional Office 7 Laboratory Section para sa pagsusuri habang ang mga suspek ay dinala sa RPDEU 7 para sa kaukulang dokumentasyon at disposisyon.
Kasong paglabag sa Sec. 5 at 11, Art II ng RA 9165 o Comprehensive Dangerous Drugs Act of 2002 ang kakaharapin ng mga suspek.
Tiniyak naman ng PNP Central Visayas sa pangunguna ni Police Brigadier General Jerry Bearis, Regonal Director, na ang mahusay at matagumpay na kampanya kontra ilegal na droga ay kanilang ipagpapatuloy para sa pagsusulong ng kaayusan at kapayapaan ng rehiyon.
