Silay City, Negros Occidental – Nasamsam sa buy-bust operation ng Negros Occidental PNP ang mahigit Php13 milyong halaga ng shabu sa dalawang magkapatid na tulak ng droga, nito lamang Linggo, ika-28 ng Agosto 2022.
Kinilala ang mga suspek na sina Angie Aguilar Dumdumaya alyas “Tomboy”, 30, at ang kapatid nitong si Angelyn Aguilar Dumdumaya, 25 anyos na parehong mga residente ng Brgy. Lantad, Silay City, Negros Occidental.
Ayon kay Police Lieutenant Judesses Catalogo, spokesperson ng Negros Occidental Police Provincial Office (NOCPPO), ang magkapatid ay na-tag bilang mga High Value Individual at kasama din sa Drug Watchlist.
Naaresto ang mga suspek bandang alas-dyes singko ng umaga sa Brgy. Lantad, Silay City, Negros Occidental ng pinagsanib pwersa ng mga operatiba ng Regional Police Drug Enforcement Unit 6 at ng Silay City Police Station
Narekober sa mga suspek ang dalawang malalaking zip lock, dalawang pakete ng shabu at isang knot tied transparent plastic bag ng hinihinalang shabu na umaabot sa dalawang kilo at nagkakahalaga ng Php13,668,000, buy-bust money at iba pang kagamitan sa transaksyon.
Ang mga suspek ay nahaharap sa kasong paglabag sa R.A. 9165 o ang Comprehensive Dangerous Drugs Act of 2002.
Ang matagumpay na operasyon ay patunay lamang na ang ating PNP ay hindi tumitigil sa pagsugpo sa paglaganap ng ilegal na droga at sa iba pang uri ng kriminalidad upang mapanatili ang kaayusan at kapayapaan sa bawat nasasakupan.
###
