South Cotabato – Timbog ang dalawang lalaki na kabilang sa Street Level Individual (SLI) matapos makumpiskahan ng Php139,000 halaga ng shabu sa ikinasang buy-bust operation ng mga awtoridad sa Purok Alegria, Brgy. Morales, Koronadal City, South Cotabato nito lamang Setyembre 11, 2023.
Kinilala ang dalawang suspek na sina alyas “Trixy”, 27, istudyante; at alyas “Brian”, 38, may asawa at pawang residente ng Koronadal, South Cotabato.
Ayon kay Police Lieutenant Colonel Amor Mio Somine, Hepe ng Koronadal City Police Station, dakong 3:19 ng hapon nang maaresto ng dalawang suspek sa pangunguna ng mga operatiba ng Koronadal City Police Station City Police Drug Enforcement Unit (CPDEU) katuwang ang PPDEU-SCPPO, at Regional Special Operations Group 12.
Nakumpiska sa mga suspek ang nasa humigit kumulang 20 gramo ng hinihinalang shabu na tinatayang nasa Php139,000, buy-bust money, drug paraphernalia at iba pang non-drug items.
Mahaharap ang dalawang suspek sa kasong paglabag sa RA 9165 o Comprehensive Dangerous Drugs Act of 2002.
Binigyang papuri naman ni Police Brigadier General Jimili Macaraeg, Regional Director ng Police Regional Office 12, ang matagumpay na operasyon ng mga awtoridad na naglalayong pigilan ang paglaganap at kalakalan ng ilegal na droga sa Rehiyong 12.
Panulat ni Patrolman Khnerwin Jay A Medelin
