Parañaque City — Tinatayang Php136 milyong halaga ng shabu ang nasabat sa joint buy-bust operation ng PNP at PDEA nito lamang Martes, Setyembre 12, 2023.
Kinilala ni Police Brigadier General Roderick Mariano, District Director ng Southern Police District, ang mga suspek na sina alyas “Mark”, 36; Jacqueline, 37; at Marion King na nakatakas.
Ayon kay PBGen Mariano, naganap ang nasabing operasyon sa Brgy. Tambo, Parañaque City bandang alas 5:50 ng hapon sa pinagsanib puwersa ng PDEA Regional Office IV-A Special Enforcement Team, PDEA RO-National Capital Region at Tambo Police Substation 2 at Parañaque City Police Station na nagresulta sa pagkakadakip sa mga suspek.
Nakumpiska sa mga ito ang isang kalibre .45 na baril, weighing scale at buy-bust money at ang mahigit sa 20 kilos ng hinihinalang shabu na may Standard Drug Price na Php136,000,000.
Ang mga naarestong suspek ay sasampahan ng kasong paglabag sa Section 5 in relation to Section 26 paragraph b (Attempt or Conspiracy to Sell of Dangerous Drugs) at Section 11 (Possession of Dangerous Drugs) Article II ng RA 9165 o Comprehensive Dangerous Drugs Act of 2002.
Ang Southern Police District ay patuloy na makikipagtulungan sa PDEA sa pagtugon sa mga problema sa ilegal na droga na parehong naglalayon na alisin ang supply at demand ng droga sa bansa.
Source: SPD PIO
Panulat ni PSSg Remelin M Gargantos
