Tinatayang Php136,000 halaga ng hinihinalang shabu ang nakumpiska ng Bulacan PNP at arestado ang dalawang indibidwal sa isinagawang drug buy-bust operation sa Barangay Tungkong Mangga, City of San Jose Del Monte, Bulacan nito lamang Miyerkules, ika-2 ng Octubre 2024.
Kinilala ni Police Lieutenant Colonel Edilmar G. Alviar, Chief of Police ng San Jose Del Monte City Police Station, ang dalawang lalaking suspek, at pawang mga residente ng nasabing barangay.
Ayon pa sa ulat ng mga operatiba ng San Jose Del Monte, naging matagumpay ang kanilang ikinasang drug buy-bust operation na kung saan narekober sa mga suspek ang tatlong pirasong hinihinalang shabu na may bigat na humigit kumulang 20 gramo na nagkakahalaga ng Php136,000, isang improvised handgun o sumpak na may 12 shotgun bullets at Php500 bill bilang marked money.
Ang mga nahuling suspek ay mahaharap sa kasong paglabag sa Republic Act 9165 o ang “Comprehensive Dangerous Drugs Act of 2002”.
Ayon kay Police Colonel Satur L. Ediong, Officer-In-Charge ng Bulacan Police Provincial Office, patuloy ang pagpapaigting ng Bulacan PNP sa kanilang kampanya laban sa ilegal na droga upang tuluyan nang mapigilan ang paglaganap nito sa buong lalawigan, para sa inaasam na mapayapa at maunlad na Bagong Pilipinas.
