Tinatayang Php136,000 halaga ng hinihinalang shabu ang nakumpiska ng mga awtoridad na nagresulta sa pagkakadakip ng dalawang indibidwal matapos ang isinagawang drug buy-bust operation sa Barangay Sapang Putol, San Ildefonso, Bulacan nito lamang Martes, ika-30 ng Hulyo 2024.
Kinilala ni Police Colonel Relly B Arnedo, Provincial Director ng Bulacan Police Provincial Office, ang mga suspek na sina alyas “Tisay” at alyas ”Ging” pawang mga residente ng naturang lugar.
Ayon pa sa ulat ng Bulacan PNP, naging matagumpay ang Provincial Intelligence Unit (PIU) katuwang ang San Ildefonso Municipal Police Station at narekober ang limang pirasong hinihinalang shabu na may bigat na humigit kumulang 20 gramo na nagkakahalaga ng Php136,000 at brown na pouch.
Ang mga nahuling suspek ay mahaharap sa kasong paglabag sa Republic Act 9165 o ang Comprehensive Dangerous Drugs Act of 2002.
Patuloy ang pagpapaigting ng Bulacan PNP sa kanilang kampanya laban sa ilegal na droga upang tuluyan nang mapigilan ang paglaganap nito sa buong probinsya para sa inaasam na mapayapa at maunlad na Bagong Pilipinas.
