Tinatayang Php130,000 halaga ng fully grown marijuana plants ang nadiskubre ng Bakun PNP sa isinagawang marijuana eradication sa Lengyatan, Kayapa, Bakun, Benguet nito lamang ika-16 ng Abril 2024.
Ayon kay Police Colonel Joseph P Bayongasan, Provincial Director ng Benguet Police Provincial Office, naging matagumpay ang operasyon sa pagsisikap ng pinagsanib na pwersa ng mga kapulisan sa pangunguna ng mga tauhan ng Bakun Municipal Police Station kasama ang PIU/PDEU Benguet PPO, RIU14, at PDEA-CAR.
Ang operasyon ay nagresulta sa pagkadiskubre ng dalawang plantasyon ng marijuana na may kabuuang lawak na 130 square meters at may tanim na 650 piraso ng fully grown na halaman ng marijuana na nagkakahalaga ng tinatayang Php130,000 Standard Drug Price.
Bagamat walang nahuling cultivator, lahat ng nasabing halaman ng marijuana ay binunot at sinunog sa mismong lugar habang ang sapat na sample ay dinala upang isumite sa RFU-Cordillera para sa qualitative test.
Pinuri naman ni PCol Bayongasan ang mga operatiba sa kanilang matagumpay na operasyon at sinisiguro naman na lalo pa nilang paiigtingin ang kanilang kampanya kontra sa ilegal na droga, gayundin upang matuldukan ang paglaganap ng pinagbabawal na gamot sa kanilang nasasakupan.
Ang pagpuksang ito ng kapulisan ay bilang pagsuporta sa isinusulong ng Pangulong Ferdinand R Marcos, Jr na Whole-of-Nation Approach na kinakailangan para masugpo ang paglaganap ng ilegal na droga at maging illegal drug-free ang bansa.
Panulat ni Pat Liezle Digman
