Nakumpiska ang tinatayang Php13.6 milyong halaga ng hinihinalang shabu na nagresulta sa pagkakadakip sa tatlong High Value Individual sa ikinasang operasyon ng mga awtoridad sa Tumaga Putik Road, Zone 5, Barangay Tumaga, Zamboanga City nito lamang ika-16 ng Hunyo 2024.
Kinilala ni Police Brigadier General Bowenn Joey Masauding, Regional Director ng Police Regional Office 9, ang mga suspek na sina alyas “Hadja”, 60 anyos, residente ng Asinan, Barangay Kasanyangan Zamboanga City, alyas “Tina”, 26 anyos, may asawa at alyas “Lala”, 32 anyos, lalaki at pawang mga residente ng Tawi-tawi.
Bandang 3:52 ng hapon nang ikasa ang buy-bust operation ng mga operatiba ng Regional Drug Enforcement Unit 9 katuwang ang NISG-WM, Zamboanga City Police Station 9 at Zamboanga City Police Station 11.
Nakumpiska mula sa mga suspek ang dalawang piraso ng vacuum sealed transparent plastic sachets ng shabu na may timbang na 2,000 gramo na tinatayang nagkakahalaga ng Php13,600,000; isang vacuum Chinese tea pack na may brand name na Qing Shan; isang pirasong Php1,000 bill na ginamit bilang marked money at 18 bundles ng Php1,000 bill na ginamit bilang bogus money.
Nahaharap ang mga suspek sa kasong paglabag sa Section 5, Article 2 ng Republic Act 9165 o “Comprehensive Dangerous Drugs Act of 2002”.
Patunay lamang na ang Pambansang Pulisya ng Pilipinas katuwang ang ibang ahensya ng pamahalaan ay hindi nagpapabaya sa kanilang sinumpaang tungkulin na hulihin ang mga taong tiwalag sa batas, mapanatiling ligtas ang komunidad, at ipatupad ang kapayapaan ng bansa para sa mas maunlad na Bagong Pilipinas.
Panulat ni Patrolwoman Louise Marie V Conde
