Nadiskubre ng mga awtoridad ang tinatayang Php12 milyong halaga ng Fully Grown Marijuana Plants sa isinagawang marijuana eradication sa Barangay Loccong, Tinglayan, Kalinga nito lamang Oktubre 2, 2024.
Ayon kay Police Colonel Gilbert A Fati-ig, Provincial Director ng Kalinga Police Provincial Office, ang matagumpay na operasyon ay ikinasa ng pinagsanib na pwersa ng Provincial Drug Enforcement Unit/Provincial Intelligence Unit; Tinglayan Municipal Police Station; 1st at 2nd Kalinga Provincial Mobile Force Company, at ng Grupo ng Revitalized Pulis sa Barangay.
Ang operasyon ay nagresulta sa pagkadiskubre ng isang plantasyon ng marijuana na may lawak na mahigit kumulang 3,000 square meters at may nakatanim na mahigit kumulang 60,000 na piraso ng Fully Grown Marijuana Plants na nagkakahalaga ng Php12,000,000 Standard Drug Price.
Bagamat walang nahuling cultivator, lahat ng binunot na Fully Grown Marijuana Plants ay naidokumento at sinunog sa mismong lugar.
Pinuri naman ni PCol Fati-ig ang mga operatiba sa kanilang matagumpay na operasyon at sinisiguro naman na paiigtingin ang kampanya kontra ilegal na droga, gayundin upang matuldukan ang paglaganap ng pinagbabawal na gamot sa kanilang nasasakupan.
Ang pagpuksa ay bilang pagsuporta sa isinusulong ng Pangulong Ferdinand R Marcos Jr., na Whole-of-Nation Approach na kinakailangan para masugpo ang paglaganap ng ilegal na droga at maging illegal drug-free ang bansa.
