Caloocan City — Tinatayang nasa Php120,000 halaga ng marijuana ang nasakote ng mga tauhan ng Caloocan City Police Station sa isang binatilyo na aktwal na gumagamit nito, nito lamang Miyerkules, Mayo 3, 2023.
Kinilala ni Police Brigadier General Rogelio Ponce Peñones Jr, District Director ng Northern Police District, ang suspek na si alyas “Ian”, 22, at naninirahan sa No. 1962 Phase 3-B Brgy. 175, Camarin Caloocan City.
Ayon kay PBGen Peñones Jr, isang concerned citizen ang nag-ulat sa mga awtoridad hinggil sa umano’y transaksyon ng ilegal na droga sa pagitan ng dalawang tao sa isang eskinita sa Phase 3-B, Brgy. 175, Camarin, Caloocan City.
Kaya naman agarang rumesponde ang kapulisan sa nasabing lugar bandang 12:30 ng madaling araw, na nagresulta sa pagkakaaresto ng suspek.
Nasabat sa kanya ang isang pulang paper bag na naglalaman ng hinihinalang pituyong dahon ng marijuana na tumitimbang ng isang (1) kilo at may halagang Php120,000.
Mahaharap ang suspek sa kasong RA 9165 o Comprehensive Dangerous Drugs Act of 2002.
Paiigtingin naman ng NPD ang kanilang mga operasyon laban sa ilegal na droga at anumang uri ng kriminalidad sa distrito upang maging tahimik at mapayapa ang Northern Metro.
Source: NPD PIO
Panulat ni PSSg Remelin M Gargantos
