Sulu – Tinatayang Php12,900,000 halaga ng tanim na marijuana ang nasamsam sa isinagawang joint operation ng PNP at PDEA sa Sitio Tubig Baba, Brgy. Pitogo, Kalingalan Caluang, Sulu nito lamang ika-6 ng Hunyo 2023.
Ayon kay Police Brigadier General Allan Nobleza, Regional Director ng PRO BAR, bandang 11:15 ng umaga ng parehong petsa ay isinagawa ng mga operatiba ng PDEA SULU BARMM, Kalingalan Caluang MPS, 1102nd Brigade, 7SAB, SULU PPO PIU, 1st PMFC, 2nd PMFC, CIDG IX, RIU IX, NICA BARMM, at 4th RMFB BASULTA, ang Case Operational Plan “Green Plant” sa humigit-kumulang 15,000 square meters na lupaing may mga halamang marijuana na nagkakahalaga ng Php12,900,000.
Dagdag pa, walang inabutang may-ari o magsasaka sa naturang lugar habang ang tatlong pirasong nakuhang fully grown marijuana plant sample ay dadalhin sa PDEA Sulu PFU para sa gagawing pagsusuri.
Nagsasagawa ng imbestigasyon ang mga tauhan ng Kalingalan Caluang MPS para matukoy ang may-ari at magsasaka nang sa gayon ay masampahan ng kaukulang kaso laban sa kanila.
Samantala, hinikayat ni PBGen Nobleza, ang mga operating unit na ipagpatuloy ang operasyon ng pagpuksa ng marijuana upang tuluyang mawala ang ilegal na produksyon at pamamahagi ng planta na ito sa rehiyon ng Bangsamoro.
Panulat ni Patrolman Charlie Nasroden Corpuz
