Lucena City, Quezon – Tinatayang Php113,016 halaga ng shabu ang nasabat sa isang suspek sa joint buy-bust operation ng PNP at PDEA sa Maharlika Highway, Brgy. Kanlurang Mayao, Lucena City nito lamang Biyernes, Setyembre 30, 2022.
Kinilala ni Police Brigadier General Jose Melencio Nartatez Jr, Regional Director, Police Regional Office 4A, ang suspek na si Ernesto Olayres Gadbilao alyas “Muhlach”, 52, residente ng Purok 3B Brgy. Dalahican, Lucena City, Quezon.
Ayon kay PBGen Nartatez Jr, bandang 2:15 ng madaling araw naaresto ang suspek ng pinagsamang puwersa ng Drug Enforcement Unit-Quezon Police Provincial Office, Provincial Intelligence Unit-Quezon, Philippine Drug Enforcement Agency 4A-Quezon at Lucena City Police Station Drug Enforcement Team.
Narekober sa suspek ang tatlong pirasong sachets ng hinihinalang shabu na may timbang na 5.54 gramo at tinatayang nagkakahalaga ng Php113,016, isang pirasong Php1,000 bill bilang buy-bust money, isang pirasong plastic-made wallet na kulay beige at isang unit ng pulang Euro motorcycle.
Nahaharap ang suspek sa kasong paglabag sa Section 5 at 11, Article ll ng Republic Act 9165 o Comprehensive Dangerous Drugs Act of 2002.
Ang Quezon PNP ay walang humpay na nakikipag-ugnay sa komunidad upang patuloy na isulong ang isang ligtas, tahimik, at payapa na probinsya ng Quezon laban sa banta ng ilegal na droga at anumang uri ng ilegalidad o krimen.
Source: Police Regional Office 4A
Panulat ni Police Staff Sergeant Donabel Dulin
