Binunot at sinunog ang tinatayang Php110,000 halaga ng Fully Grown Marijuana Plants na nadiskubre ng mga operatiba sa isinagawang marijuana eradication sa Silam, Kayapa, Bakun, Benguet nito lamang ika-27 ng Hunyo 2024.
Ayon kay Police Colonel Joseph P Bayongasan, Provincial Director ng Benguet Police Provincial Office, naging matagumpay ang operasyon sa pagsisikap ng pinagsanib na pwersa ng mga pulisya sa pangunguna ng Bakun Municipal Police Station kasama ang Provincial Drug Enforcement Unit/Provincial Intelligence Unit Benguet PPO, Regional Intelligence Unit-14 at Philippine Drug Enforcement Agency-Cordillera.
Ang operasyon ay nagresulta sa pagkadiskubre ng isang plantasyon ng marijuana na may nakatanim na humigit kumulang 550 piraso ng marijuana na nagkakahalaga ng Php110,000.
Bagamat walang nahuling cultivator, pinuri naman ni PCol Bayongasan ang mga operatiba sa kanilang matagumpay na operasyon at patuloy na paiigtingin ang kanilang kampanya kontra ilegal na droga upang matuldukan ang paglaganap ng ipinagbabawal na gamot sa kanilang nasasakupan bilang tugon at suporta sa isinusulong ng kasalukuyang administrasyon na maging drug free ang ating bansa tungo sa Bagong Pilipinas.
Panulat ni PSSg Juderick S Tasing
