Tinatayang nasa Php103,000 halaga ng hinihinalang shabu ang nakumpiska mula sa dalawang indibidwal sa isinagawang buy-bust operation ng mga tauhan ng Talakag Municipal Police Station sa Barangay Dagumbaan, Talakag, Bukidnon nito lamang ika-14 ng Marso 2024.
Kinilala ni Police Captain Benjamin A Alvarez III, Officer-in-Charge ng Talakag MPS, ang mga suspek na sina Alyas “Donald”, 28, single, at residente ng Purok 1, Barangay Panang, Wao, Lanao del Sur at alyas “Aron”, nasa hustong edad, may asawa, at residente ng Purok 4, Barangay Panang, Wao, Lanao del Sur.
Nakuha mula sa mga suspek ang tatlong pakete na naglalaman ng puting crystalline substance na pinaniniwalaang shabu na tinatayang may timbang na 15 gramo at market value na Php103,000; isang unit na Honda XRM 125 na walang plate number; Php1,000 bill; at iba pang drug paraphernalia.
Nahaharap ang mga suspek sa kasong paglabag sa Section 5 at 11, Article II ng Republic Act 9165 o Comprehensive Dangerous Drugs Act of 2002.
Nagpahayag naman si Police Captain Alvarez ng kanyang papuri sa mga rumesponde sa ipinakita nilang mahusay na trabaho. Idinagdag din niya na ito ay alinsunod sa pahayag ni Pangulong Ferdinand Marcos, Jr. na ipagpatuloy ang kampanya kontra sa ilegal na droga na may paggalang sa karapatang pantao at nakatuon sa rehabilitasyon at pag-unlad ng socio-economic ng bansa.
Panulat ni Pat Rizza C Sajonia
