Valenzuela City — Timbog ang dalawang suspek matapos makumpiska sa kanila ang tinatayang Php102,000 halaga ng shabu sa isinagawang buy-bust operation ng mga operatiba ng Valenzuela City Police Station nito lamang Linggo, Oktubre 15, 2023.
Kinilala ni PBGen Rizalito Gapas, District Director ng Northern Police District, ang mga suspek na sina alyas “Joel”, 50, residente ng Barangay 128 Tondo Manila; at alyas “Marilyn”, 51, president of Barangay 128, Tondo Manila.
Ayon kay PBGen Gapas, naaresto ang suspek matapos siyang magbenta ng one piece heat-sealed transparent plastic sachet sa isang police poseur buyer kapalit ng buy-bust money bandang 2:45 ng madaling araw sa kahabaan ng Gen T De Leon Road corner Calle Onse, Barangay Gen T De Leon, Valenzuela City.
Nasamsam sa posesyon ng mga suspek ang tatlong pirasong heat-sealed transparent plastic sachet ng hinihinalang shabu; isang tunay na Php500 na may kasamang labingwalong (18) pirasong Php500 boodle money (buy-bust money); dalawang (2) piraso ng Php100; isang (1) kulay na itim na coin purse; at isang (1) unit ng Samsung Android cellphone.
Ang mga nakuhang ebidensya ng droga na pinaniniwalaang shabu ay may tinatayang timbang na humigit-kumulang 15 gramo na nagkakahalaga ng Php102,000.
Paglabag sa seksyon 5 at 11 sa ilalim ng Artikulo II ng RA 9165 o Comprehensive Dangerous Drugs Act of 2002 ang kahaharapin ng mga naarestong suspek.
Hindi titigil ang kapulisan ng NPD sa pagsasagawa ng mga operasyon sa anumang uri ng kriminalidad lalong lalo na sa kampanya kontra ilegal na droga upang hindi na ito makapanghikayat ng mga inosenteng indibidwal at tuluyan na itong matuldukan.
Source: NPD PIO
Panulat ni PSSg Remelin M Gargantos
