Cebu City – Tinatayang nasa Php102,000 halaga ng shabu ang nasabat sa isang drug pusher sa ikinasang buy-bust operation ng Police Station 5, Cebu City Police Office (CCPO) sa Manalili St., Barangay Ermita, Cebu City noong Marso 20, 2023.
Kinilala ni Police Major Kenneth Paul Albotra, Police Station 5 Commander ng CCPO, ang naaresto na si alyas “Jomar”, residente ng Barangay Bagakay, Sibonga, Cebu.
Ayon kay PMaj Albotra, nadakip ang suspek dakong alas-9:10 ng gabi matapos makabili ang nagpanggap na poseur buyer mula sa suspek ng isang sachet ng hinihinalang shabu.
Ayon pa kay PMaj Albotra, nakumpiska mula sa suspek ang nasa 15 gramo ng shabu na nagkakahalaga ng Php102,000.
Mahaharap ang suspek sa kasong paglabag sa Sec. 5 at 11, Art. II ng RA 9165 o Comprehensive Dangerous Drugs Act of 2002.
Patuloy na hinihikayat ni Police Colonel Ireneo Dalogdog, City Director ng CCPO, ang buong hanay ng PS 5 na ipagpatuloy ang pagpapahusay at pagpapaigting sa pagsugpo ng problema sa ilegal na droga sa kanilang nasasakupan.
