South Cotabato – Umabot sa Php102,000 na halaga ng hinihinalang shabu ang nakumpiska sa PNP-PDEA buy-bust operation sa isang tulak ng ilegal na droga noong Biyernes ng hapon sa Purok 10A, Brgy. Poblacion, Tupi, South Cotabato, noong Enero 27, 2023.
Arestado naman ang drug suspect na si alyas “Montong”, 35, may kinakasama, welder at residente ng Prk. New Society, Brgy. Apopong, General Santos City.
Ayon kay Police Major Rafael Banggay Jr., Hepe ng Tupi Municipal Police Station, nadakip ang suspek matapos na kumagat sa isinagawang anti-illegal drug buy-bust operation ng RPDEU12 (lead unit); RID12; RSOG; RIU12; Tupi MPS-SCPPO at PDEA 12.
Nakuha sa operasyon ang buy-bust item na isang maliit at tatlong malalaki na pakete ng hinihinalang shabu.
Nakuha rin sa pag-iingat ng suspek ang ginamit na Php1,000 na nagsilbi bilang buy-bust money.
Aabot sa 15 na gramo na may tinatayang Php102,000 halaga ang nakumpiskang ilegal na droga.
Mahaharap ang suspek sa kasong paglabag sa Section 5 at 11 Article II ng RA 9165 o Comprehensive Dangerous Drugs Act of 2002.
Ang naturang operasyon ay kaugnay sa One-Time-Big Time na operasyon kontra droga na naglalayong masugpo ang ilegal na droga at iba pang krimen upang masiguro ang kaligtasan ng bawat mamamayan sa Rehiyong SOCCSKSARGEN.
Source: Tupi Municipal Police Station
Panulat ni Patrolman Khnerwin Jay A Medelin
