General Santos City – Tinatayang nasa Php102,500 halaga ng ilegal na droga ang nakumpiska sa isang lalaki na kabilang sa listahan ng Street Level Individual sa ikinasang buy-bust operation ng PNP at PDEA sa Honorio Arriola St, Brgy. Bula, Gen. Santos City nito lamang Hulyo 1, 2023.
Kinilala ni Police Colonel Jomar Alexis Yap, City Director ng General Santos City Police Office, ang naarestong suspek na si alyas “Allan”, 48, may kinakasama, Sikad Driver, at residente ng Barangay Conel, General Santos City.
Ayon kay PCol Yap, bandang alas-9 ng gabi ng isinagawa ang operasyon ng pinagsanib na mga operatiba ng City Police Drug Enforcement Unit, GSCPO-Police Station 6, City Intelligence Unit, CIDMU, City Mobile Force Company, Regional Police Drug Enforcement Unit 12, Regional Intelligence Unit 12, Regional Specials Operation Group 12, Maritime Police Station sa pakikipag-ugnayan sa PDEA12.
Dagdag pa ni PCol Yap, binentahan umano ng suspek ang nagpanggap na poseur-buyer ng isang piraso ng plastic sachet na naglalaman ng hinihinalang shabu na may bigat na 0.2 gramo.
Kasabay sa pagkakaaresto ng suspek, nakuha pa mula sa kanya ang isa pang pakete ng hinihinalang shabu na may timbang na 15 gramo na nagkakahalaga ng Php102,000, Php500 bill na ginamit bilang buy-bust money, at iba pang non-drug item.
Mahaharap ang suspek sa kasong paglabag sa RA 9165 o Comprehensive Dangerous Drugs Act of 2002.
Ang GenSan PNP ay patuloy sa pagsasagawa ng mga ganitong operasyon upang matigil ang paglaganap ng ipinagbabawal na droga sa lungsod upang mapanatiling ligtas ang bawat mamamayan sa kanilang nasasakupan.
Panulat ni Patrolman Khnerwin Jay A Medelin
