Valenzuela City — Tinatayang Php102,000 halaga ng shabu kasama ang mga gamit na patalim ang nakumpiska sa isang binatilyo habang nagpapatrolya ang mga tauhan ng Valenzuela City Police Station nito lamang Huwebes, Hunyo 15, 2023.
Kinilala ni Northern Police District Director, PBGen Ponce Rogelio I. Peñones Jr, ang suspek sa pangalang Ronaldo, 23, binata, construction worker, at naninirahan sa Magiliw St., Pinalagad, Malinta, Valenzuela City.
Ayon kay PBGen Peñones Jr, nagsagawa ng patrolya ang mga tauhan ng Sub-Station 4, VCPS bandang alas-4:50 ng hapon sa kahabaan ng Area 4 Dumpsite, Pinalagad, Malinta, Valenzuela City nang makita ang suspek na palinga-linga at pinaglalaruan ang isang natitiklop na kutsilyo (balisong) at nang ito’y sisitahin at aktong aarestuhin, kanilang nakumpiska sa kanya ang umano’y shabu.
Narekober kay Ronaldo ang tatlong piraso ng heat-sealed transparent plastic sachet na naglalaman ng hinihinalang shabu, isang pirasong black coin purse, at isang (1) pirasong folding knife (balisong) na may sukat na 9 na pulgada kasama ang hawakan nito.
Mahaharap ang suspek sa kasong paglabag sa BP 6 (Illegal possession of bladed, pointed or blunt weapon) at Section 11 (Illegal Possession of Dangerous Drugs) sa ilalim ng Article II ng RA 9165 o Comprehensive Dangerous Drugs Act of 2002.
Pinupuri ni PMGen Edgar Alan O Okubo, Regional Director ng NCRPO ang Valenzuela City Police Station dahil sa dedikasyon ng hepe nito at kanyang mga tauhan dahil sa maagap na pagkilos nila upang pigilan ang sana’y mangyayaring krimen. Dahil dito, nananatiling alerto ang pulisya upang mapanatili ang kapayapaan at kaayusan sa Metro Manila.
Source: NPD PIO
Panulat ni PSSg Remelin M Gargantos
