Quezon – Tinatayang nasa Php10,434,600 halaga ng shabu ang narekober ng mga awtoridad sa isang banyo ng isang fast food restaurant sa Candelaria, Quezon nito lamang Huwebes, Agosto 10, 2023
Ayon kay Police Colonel Ledon Monte, Provincial Director ng Quezon Police Provincial Office, tumitimbang ng mahigit kalahating kilo ng pinaghihinalaang shabu na may tinatayang halaga na Php10,434,600 ang natagpuan ng isang service crew sa loob ng banyo.
Napag-alaman na sa oras na iyon ay may mga police patrollers na kumakain na nakikitang dahilan kung bakit iniwan ang nasabing kontrabando.
Patuloy ang masusing imbestigasyon ng Quezon PNP upang matukoy ang pagkakakilanlan ng suspek na nag-iwan ng nasabing kontrabando na walang ibang dulot kundi ang pagwasak ng magandang kinabukasan ng ating mga kabataan at kriminalidad sa ating lipunan.
“Sa pangyayaring ito, makikita natin na malaki ang maitutulong ng mga kababayan natin sa ating kampanya laban sa ilegal na droga. Nagpapasalamat tayo sa mga staff at management ng Mang Inasal dahil sa tama at mabilisan nilang pagtugon matapos madiskubre na may kontrabando sa kanilang lugar”, saad ni PCol Monte.
Source: Quezon Police Provincial Office
Panulat ni PSSg Grace Neville Ortiz
