Cebu City – Nasabat ng Cebu City PNP ang nasa mahigit Php10.26 milyong halaga ng shabu mula sa tatlong tulak ng ilegal na droga sa isinagawang buy-bust operation sa Sitio Gochan, Brgy. Pahina Central, Cebu City nito lamang Huwebes, Marso 16, 2023.
Kinilala ni Police Colonel Ireneo Dalogdog, City Director ng Cebu City Police Office, ang mga suspek na sina alyas “Talolong”, 27, residente ng nabanggit na lugar; alyas “Ramil”, 40 at “Benjie, 31, parehong residente ng Sitio Avocado, Brgy. Mambaling, Cebu City.
Ayon kay PCol Dalogdog, bandang 8:20 ng gabi nang ikasa ng mga operatiba ng Station Drug Enforcement Unit ng Police Station 6, CCPO ang operasyon na humantong sa pagkakaaresto ng tatlong suspek at pagkakakumpiska ng nasa 1.5 kilo ng shabu na may tinatayang halaga na Php10,268,000.
Nakuha rin sa mga suspek ang isang waist bag na ginamit bilang lagayan ng mga ilegal na droga at buy-bust money.
Kasalukuyang nahaharap ang tatlong suspek sa kasong paglabag sa RA 9165 o ang Comprehensive Dangerous Drugs Act of 2002.
Samantala, pinuri naman ni PBGen Jerry Bearis, Regional Director ng Police Regional Office 7 ang mga operating unit ng CCPO dahil sa matagumpay at pinaigting na kampanya kontra ilegal na droga batay na rin sa isang komprehensibo, analytical, at intelligence-based policing approach.
Siniguro naman ng buong hanay ng Cebu City PNP na lalo pa nilang pagbubutihin ang pagpapaigting sa kampanya kontra ilegal na droga para matiyak ang kaayusan, kaligtasan, at kapayapaan ng komunidad.
