Mt. Province – Tinatayang Php1,944,000 halaga ng marijuana ang nasamsam habang nasakote ang tatlong suspek sa isinagawang interdiction operation ng Mountain Province PNP sa Sitio Malupa, Abatan, Bauko, Mountain Province nito lamang ika-23 ng Agosto 2023.
Ayon kay Police Colonel Sibly Dawiguey Jr, Provincial Director ng Mountain Province Police Provincial Office, naging matagumpay ang operasyon sa pinagsamang pagsisikap ng iba’t ibang Unit ng Mt. Province PNP kasama ang PDEA Mountain Province.
Isinagawa ang interdiction operation matapos makatanggap ng impormasyon ang himpilan ng pulisya hinggil sa umanoy transportasyon ng mga tuyong dahon ng marijuana na nagresulta sa pag-aresto sa mga suspek at pagkumpiska ng mga ebidensya.
Nasamsam sa mga suspek ang kabuuang 17 bricks ng pinatuyong dahon ng marijuana at isang rolled na tumitimbang ng 16,165 gramo na nagkakahalaga ng Php 1,939,800; at isang itim na plastic bag na naglalaman ng marijuana kush na tumitimbang ng 3.5 gramo at nagkakahalaga ng Php4,200, isang Toyota Vios; dalawang backpack; isang maliit na tubo na may latak ng marijuana; isang itim na lighter; isang vape; at isang ID pouch na may ID.
Ang mga suspek ay sasampahan sa kasong paglabag sa RA 9165 o Comprehensive Dangerous Drugs Act of 2002.
Nagbabala naman si PCol Dawiguey Jr. sa mga nagbabalak mag-angkat o di kaya magtransport ng ipinagbabawal na droga sa kanyang nasasakupan na hindi titigil ang kanyang himpilan sa pagsugpo at pagpapaigting sa kampanya laban sa ilegal na droga.
