Nasabat ang Php1,822,400 halaga ng shabu mula sa naarestong dalawang suspek sa isinagawang drug buy-bust operation ng PNP at PDEA BARMM sa Barangay Making, Parang, Maguindanao del Norte nito lamang ika-7 ng Hunyo 2025.
Kinilala ni Police Major Blayn M Lomas-E, Chief of Police ng Parang Municipal Police Station, ang mga suspek na si alyas “Bong”, 31-anyos, isang magsasaka mula sa Barangay Langkong, Matanog at si alyas “Roman”, 38-anyos na residente naman ng Barangay Bayanga, Matanog Maguindanao del Norte.
Bandang 6:31 ng gabi ng nasabing petsa, nang ikasa ang naturang operasyon sa pinagsanib pwersa ng mga operitiba ng Maguindanao del Norte PNP at PDEA BARMM na nagresulta sa pagkakaaresto ng mga suspek at pagkakakumpsika ng mga kaukulang ebidensya.
Nakuha mula sa mga suspek ang tatlong transparent plastic sachet na naglalaman ng pinaniniwalaang shabu, na may timbang na humigit-kumulang 268 gramo at may tinatayang halaga na Php1,822,400; at buy-bust money.
Mahaharap sa kasong paglabag sa Republic Act 9165 o “Comprehensive Dangerous Drugs Act of 2002” ang mga suspek.
Pinuri naman ni Police Colonel Eleuterio M. Ricardo Jr., Provincial Director ng Maguindanao Del Norte Police Provincial Office, ang pinagsamang pagsisikap ng lahat ng mga yunit dahil sa isang matagumpay na operasyon. Anya, ito ay patunay ng patuloy na kampanya ng Maguindanao del Norte -PPO laban sa iligal na droga.
Panulat ni Pat Veronica Laggui
